له هغو سره به څه فکر د يار وي - رحمان بابا

له هغو سره به څه فکر د يار وي

چې ياران یې په هر لور هزار هزار وي

.

په آشنا پسې ويشتلی هم هغه وي

چې له نورې اشنايۍ یې استغفار وي

.

صبوري او قراري دې په ما زوم شي

که بې تا به مې يا صبر يا قرار وي

.

هر ژوندون د يار په وصل ښايسته وي

بې مينه که ژوندون وي، څه پکار وي؟

.

که د يار له لاسه اور په یار بلېږي

هغه اور وَ عاشقانو ته ګلزار وي

.

په يارۍ کې ازار نشته، خدای دې نه کا

که ذره به زما زړه له تا ازار وي

.

وَ هغو ته عاشق نه ويلی بويه

چې یې فکر يا د سر يا د دستار وي

.

ځای يې اور شي چې زُنار يې شي په غاړه

ولې نه چې ستا د زلفو زُناردار وي

.

ستا د زلفو زُناردار که په اور سوځي

هغه اور به هم رښتيا ستا د رخسار وي

.

هغه جونه به ليلا غوندې رسوا شي

چې رحمان غوندې مجنون يې په ديار وي