د زړه درده لېونی شوې که نه - صاحب شاه صابر

د زړه درده لېونی شوې که نه

زما صابره ته سړی شوې که نه

تا د الفت معجزه نه منله

زه چې لمبه شوم ته لوګی شوې که نه

د محبت ګرمي دې ولیدله

په یخو واورو کې خولې شوې که نه

ما چې د زړه د رڼا رنګ ورکړو

د انتظار لارې رڼې شوې که نه

ما درته وې چې سترګې مه توروه

د خلقو سترګې درپسې شوې که نه

نوے الزام راباندې ولګوه

زړې خبرې خو زړې شوې کنه

د بڼو سوري ته مې کښېنولې

صابره سترګې دې مړې شوې که نه