تنګ شومه زۀ هم د امن لاره چرته ګورمه
دا چې د وطن هر سوزېدلي غر ته ګورمه 

ولې دا پۀ څۀ اخېر د کوم جرم سزا خورمه
زړۀ مې چوي پښتونه چې دې کوم پرهر ته ګورمه 

داسې پۀ اعصابو مې راخور دے د جنګونو شور
خوب وينم اکثر او د چا وران کنډر ته ګورمه

شته پکښې د ژوند د تېرولو څۀ اثار کۀ نه
هسې پۀ شا شا دې پورې شوي ور ته ګورمه

خلق د سپوږمۍ پۀ لوري لاړل او مريخ ته ځي
زۀ لا د زخمي وجود د لر او بر ته ګورمه

تاته څۀ پټ پټ او پۀ غلا کتل مې داسې وي
دا لکه چې زۀ تندر نيولي نمر ته ګورمه

خلق دې د امن تصور لري پۀ زړونو کښې
زۀ خو هر يو زړۀ ساتم زۀ هر ځيګر ته ګورمه